*****
سيرك..إتنصب....
فيه الأمين..واللي نـَصب
فيه البرئ.........
واللي بينخـُر في العـَصب
فيه اللي صافيّه نـِيتـّه
واللي لابـِدلك في القصب
شايل سلاحه ..يخضـّنا
بالجنـّه والنار والحَصب
وحجاره من سجيل..مـَطر
ينصـّب فوق الأرض صّب
أمـّا النتيجة المؤلمـــــــه
مصر اليتيمــه..بتُغتصَب
*****
طلع الشبح......
كهفي الملامح ..قام نبح
سرق المئونه كلها
قـُلت : اللي يفضَل
قاللي : بـّح.......
ياللي لـِعبت معايا دحّ
ما تقولش بعد الضرب أّح
يا ناس خلاص ..صوتي إتنبح
قوموا إلحقوا..
مصر الحزينه..بتندبـَح
*****
ياللي جـايّ..تـفشّ غـِلكّ
خللي نار تارك..تـِدلـّك
بكره نفس النار..تضلـّك
واللي مال لِك يوم..يمِلـّك
والـــــلي حـَلـّيته..يحـِلـّك
واللي كــان ذ ّلـّك..يذِلـّك
*****
الحياه أيام ...ودايره
الحياه مش واقفه..سايره
بس بعد الغول ما كشّر
مصر ثايره..يعني ثايره
مصر مش عميانه..حايره
مصر مش عانس ..وبايره
*****
مصر ..حـِلوه
مصر خـُطـّابها..ألوف
واللي طالبين وِِدّها..
واقفين صفوف
مصر أحلي نجمه تسكـُن
في القصور..تـِلبس شفوف
مصر كعبه نحّج..ليها
واللي جــــــاي زاير يطوف
هيـّه صاحبة عـِزّه وإحنا
نيجي للأعتاب..ضيوف
وإنت عامل نفسك أعمي
وألا طول الضلمه يعمـي
يا أعمي فتـّح..بص شوف
عُملتك مش م الزمان ده
هـِدمتك مش م الزمان ده
هيئتك مش م الزمان ده
يا غـبّي..بطـّـــل معانده
مصر مش يـَشمك..وحَـبره
مش عشان ع الغـُلب صابره
تحبسوها..بـحُكم طاعه
جوا قـُمقـُم..في الكهوف
*****
الجواز باطل..وحـَلـّه
ع اللي ب " الصندوق" أحَلـّه
كل شيئ..يرجع محـَلـّه
والعروسه..للعريس
اللي راح يـِديها دمـُه
راح فـطيس
اللي كان يحلم بفَرَحُه
يوم خميس
اللي مش طالب زعامه
أو إمامه أو رئيس
اللي قلبه فـُل أبيض
مش منافق..مش خنيس
*****
اليمامه البيضا ترجع لليمام
وال"غـُراب " يوقف نعيقه
والخـَطابه..والكلام
يوم مايحصل ده..ها نـِهتف
" أدخلوا مصر بسلام "
غير كـده..ياللي إنت مصري
قول علي مصر السلام
*****[justify]
الثلاثاء مايو 01, 2012 12:03 pm
