*صوت الفقير*

صوت الفقير
يازمن البشوات ياكبير
ليه الفقير عندكوصغير
وبيتعامل على انه حقير
كل الشباب اتظلم
وشبع تكدير
واللقمه بقت علقم
وكل يوم تعكير
قالوا من فيهم محترم
وعامل فيها كبير
مين اللي بيطالب بالصوت والقلم
بالاصلاح والتغيير
والحق صبح هرم
حواليه مناشير
قالوا ابعدوهم عن الهرم بكتير
واكتبوا مغلق عن الجماهير
لوانتا واحد من البلد دي
عيش فقير
واوعى تنسى فـ يوم تحلم
زيهم تبقى كبير
دول الحيتان والمناشير
دول الديابه والدبابير
دمنا كيزان عندهم
واللحم بالقناطير
*******
يازمن البشوات ياكبير
ليه الفقيرعندكوا صغير
وبيتعامل على انه حقير
هوا مش بني آدم برضه
ومصري اصيل اصله
ولا عشان ما هوا فقير
مينفعش يعيش بضمير
عم اسماعيل المكوكجي راجل فقير
والست احسان عالنصيه بتبيع جرير
وعندنا تاني زيهم في الحته كتير
ناس على الله رزقهم بيومهم ويقولوا كتير
قالوا البلاديه معديه كلوا يطير
اقفل ياعم اسماعيل ياكبير
ولمي ياست حسنيه الفجل والجرير
ولما اتمسكوا بحقهم
وقالوا مش هنفر ولا هنطير
احنا بنبيع بضمير
وكل سلعه مكتوب عليها التسعير
عملولهم قضيتين من غير تحذير
واتشمع دكان الغلبان الكبير
وقضية اشغال لبيع لفجل والجرير
واحسان دموعها نزلت كتير
اروح فين ومين يوكل العيال
وفين منكم نروح يااهل التكدير
عم عبده البقال
على نفس الحال
مسلمش منهم وليه رب كبير
******
يازمن البشوات ياكبير
ليه الفقير عندكوا صغير
ويتعامل على انه حقير
الناس الغلابه في بلدنا كتير
قلوبهم زي الدهب
وارق من الحرير
مبيحبوش الازيه لحد
وطول عمرهم مسالمين بجد
صابرين على احوالهم
وراضيين وحامدين على اللي بيجرالهم
لكن كل صبر وليه حدود
ولما تتفرض علينا قيود
يبقى لازم نخرج وعددنا كتير
نعلي صوتنا نفهم الكبير
جايز يكون مش فاهم
اوعامل مهوش فاهم
ودا شيئ خطير
يالا ياولاد بلدنا وانتوا كتير
نلم بعضنا وعلى الميدان النفير
لازم نطالب بحقوقنا ونغير
على مستقبلنا دا المستقبل كبير
ونقولهم وصوتنا عالي جهير
يازمن البشوات ياكبير
ليه الفقير عندكوا صغير
وبيتعامل على انه حقير